做小囡革先就听老代里讲，过年了檐尘是总归要掸个，除非烂料人家，檐尘勿掸过个是邋遢年，会拨勒人家看勿起。

革末为何要勒勒年夜快掸檐尘呐？ 

——差勿多孩晓得个道理，病毒、细菌叛勒灰尘垃圾里，掸檐尘拿伊特清除出去，利于除害灭病，一家老小健健康康过个太平年。

——另外一个原因，灰尘个“尘”字搭子陈旧个“陈”字声音一样，掸檐尘有“除陈迎新”个意思，勿光除去灰尘，还拿陈年里个霉气晦气统统掸脱，迎接大吉大利个新一年。 

也是我里崇明个传统，过年了要祭神、请老祖宗，答谢伊特保佑一家六门身体健康，样样事体顺顺流流。掸檐尘出理勒里里外外清清爽爽，欢迎神仙、老祖宗来过年，求伊特保佑开年更加好。

正因为掸檐尘有蛮多个意义，故所以前世今生个崇明人交关重视，孩当大事体来做。

先是要有计划，拿现在个说话叫做“预案”，先做何事体？后做何事体？末结煞做何事体？何人末做何？哪革样要大家搭档做？家长一一安排好，大家心里有数。还要隔夜备好用得着个家生，譬如扎好长柄扫帚，专门用来掸高处个灰尘；还兜头揩面布、旧衣裳啦，防止垃圾灰尘落勒头浪身浪。

掸檐尘当天，清街老早眼眼吃好饭，一家六门就缲拳勒臂动手了。一般来讲，女客汰帐子、净被单，晒被头床柴；男客拿小架厨、台条椅凳、坛甏家生统统搬到场心浪，一样一样掸过去揩过去，忒龌龊个要湿子水板刷刷；小囡已经放学了，勿管小娘、猴子也来帮忙，大人叫伊做哪革样就做哪革样，或者拣自家有处做个做。

灶屋里出空以后，有处进去掸檐尘了。前革歇崇明草屋多，天面搭子墙头孩是芦芭，上头屯满子灰尘、结蛛网。掸个辰光要全副武装，身浪着好旧衣裳，头浪兜好揩面布。收算革样子，总归弄勒白望匼匼。

一般来讲，先掸天面、桁料、椽子，再掸山头、四壁，上下左右掸好后揩门窗、汰灶头镬子、扫地。

房头里掸檐尘还要讨厌勒，搬得动个搬到外头去掸勒揩，勿便搬出去个三联厨啦、大厨啦、大床啦，拿旧被单罩起来，然后像灶屋间里革样从屋顶掸到四壁。厨箱、抽台是吃喜酒辰光备个，孩要把把细细个揩，连搭黄铜铰链、把手，也要揩勒敞敞亮，脱子新个一式一样。

过了下昼汛里，晒勒干干松松个床柴、被头一道收进去，重新铺好；灶屋里个台条椅凳、坛甏家生，放勒外头吹子大半天，晒子日头又杀了菌，也逐样搬转去。

末结煞末大家动手，拿场心浪、山头边，屋后头打扫勒光光生生，出路修筑勒平平填填。

吃辛吃苦筛陀子一天，檐尘掸好特，里里外外、上上下下变勒刷拉打清，看上去捂爽特来拗去话夷。

老早个辰光，崇明掸檐尘还要拣热脚，有汛拣勒阴历十二月廿三、廿四两天，因为廿四夜夜里祭灶，出理勒清清爽爽送灶老爷上天，讨灶老爷欢心，让伊向玉皇大帝多讲点本家好话。有汛人家拣在廿七、廿八，“七”搭子“切”、“八”搭子“扳”同音，革两天掸子檐尘，灰尘切结、扳结勿会落下来。蛮多人家廿六弗掸，因为“六”搭子“落”声音一样，廿六掸子檐尘要落零落拉；廿九也勿掸，因为“九”搭子“皱”声音也是一样个，廿九掸子檐尘皱勒皱荡零荡零。有人话革是迷信，其实是图个吉利呀，用勿着大惊小怪个。

“文革”辰光，旧社会流传下来的物事，动勿动扣上“四旧”个帽子，硬性禁脱。掸檐尘倒呒宁禁脱，一直保留到即歇，连搭名字也呒宁改。